上回就講到我夜遊陽朔西街啦！之後第二日我地就一早出發上龍勝啦！
我地其實約左個司機1015係酒店附近接我地，之後司機車我地去客運站後，再轉乘大架旅遊巴，就開始我地長途既車程啦！經過3個半鐘頭後既車程！醒下訓下咁！不知不覺間我地就入到龍勝景點區既入口啦！
之後有位姐姐就走上架車同我地講要買票先可以入去龍勝啦！而票價分好多種既！香港人就80蚊人仔！同埋順便係咁E介紹下其實龍勝區主要有四個莊寨，分別係龍脊古莊寨梯田，平安莊寨梯田，金坑紅瑤梯田，小寨紅瑤梯田，而入每一個寨遊客都要出示張門票，如果無既話就要重新買過啦！
而我地當時車上有二位姐姐係帶左一人一個喼來既！佢都有提示埋喼就最好唔好帶上山啦！因為山路多而且都崎嶇，拎住個喼行山唔係唔得，一係就當減肥，一係就要洗少少錢，搵當地村民幫你手拓上山啦！所以就建議二位姑娘寄存係山下，比個膠袋佢地裝住貴重物品同隨身物品，咁我依位背包客當然唔關事，成車人等埋佢地搞埋一大輪後，再經過10-15既車程！就到達我今次要住同埋觀賞梯田既地方
平安莊寨門口
利申：桂林市同陽朔市都有車直達到龍勝架！ 陽朔距離比桂林市遠，班次就唔多，我無記錯最尾個班1330會係陽朔市開！所以建議諗住搭大巴上龍勝既朋友要預早問定時間同班次！而我今次就係陽朔市既觀光服務處到買車票，出發前一晚姐係夜遊西街果時買定既，價錢110人仔啦！如果住桂林市既朋友價錢應該會再平d。
Comments